Laerdal Vöðlupakki (Dömu) IV

Laerdal Vöðlupakki IV er vel samsettur pakki fyrir veiðikonur sem vilja léttar og þægilegar vöðlur ásamt traustum vöðluskóm fyrir göngu og veiðar. Laerdal vöðlurnar frá Guideline eru sniðnar fyrir konur og hannaðar með áherslu á hreyfigetu, þægindi og notagildi.

Vöðlurnar eru úr léttu þriggja laga efni ofan mittis og sterkara fjögurra laga efni að neðan, þar sem meira reynir á við göngu og vað. Þessi uppbygging heldur þeim liprum í notkun en eykur endingu á álagssvæðum. Sniðið situr vel yfir bringu og stillanlegt mittið gerir auðvelt að laga vöðlurnar að líkama og undirfatnaði.

Laerdal má nota sem hefðbundnar brjóstvöðlur en einnig færa niður í mittishæð þegar hlýtt er í veðri eða meiri loftun er æskileg. Framan á þeim er rúmgóður vasi sem fellur út þegar hann er opnaður og þar fyrir aftan er fóðraður vasi til að verma hendur. Innbyggðar festingar fyrir veiðitól gera auðvelt að hafa taumaklippur, losunartöng og annan smábúnað við höndina.

Vöðlusokkarnir eru úr náttúrulegum gúmmíefnum og mótaðir þannig að þeir krumpist síður í skónum. Áfastar sandhlífar falla vel yfir flesta vöðluskó og halda sandi og smásteinum frá. Sterkt nælonbelti fylgir og má staðsetja eftir þörfum. Vöðlurnar eru fáanlegar bæði í Regular og Queen-stærðum.

Patagonia Forra vöðluskórnir eru hannaðir fyrir léttleika, stuðning og gott grip við fjölbreyttar aðstæður. Yfirbyggingin er úr slitsterku Cordura® nylonneti sem þornar hratt og heldur skónum léttum. Hátt snið við ökkla veitir stöðugleika og vernd, á meðan styrkt táhlíf kemur sér vel þegar vaðið er í grýttu undirlagi.

Vibram® Mars sóli með XS Trek gúmmíblöndu veitir gott grip bæði í göngu og við veiðar. Skórnir eru með stillanlegu reimakerfi úr vefborða, tæringarfríum festingum og innbyggðu frárennsliskerfi sem losar vatn hratt úr þeim. Þetta er vandaður pakki fyrir þær sem vilja þægilegar dömuvöðlur og létta en trausta skó.