Loop ZT Tvíhendupakki 13′ #7

Mjög vandaður fluguveiðipakki sem inniheldur Loop ZT 6-hluta tvíhendu, Loop Evotec G5 fluguveiðihjól, undirlínu og Hofsá flotlínu eða aðra sambærilega línu. Vinsamlegast takið fram óskir um annað línuval í skilaboðareitnum í körfu.

Þessi tvíhendupakki hentar sérstaklega vel í meðalstórar laxveiðiár. Stöngin er með djúpa en öfluga hleðslu, einstaklega nett og skemmtileg í fiski. Hún vinnur vel með flotlínu og löngum frammjókkandi taumum, og nýtur sín við krefjandi aðstæður þar sem nákvæm framsetning skiptir máli.

Loop ZT tvíhendurnar byggja á sömu grunngildum og Loop Z1, en eru í sex pörtum í stað fjögurra. „T“ stendur fyrir „travel“, enda eru þessar stangir hugsaðar með ferðalög í huga – hvort sem um er að ræða innanlandsferðir eða veiði í erlendum vatnasvæðum. Þær eru fáanlegar í fjölbreyttum stærðum sem henta mismunandi aðstæðum, með meðalhraðri sveigju (medium fast action), djúpri hleðslu og miklu afli. Léttleiki, næmni og frábær stjórn gera þær að áreiðanlegu verkfæri fyrir veiðimanninn.

Z-stangirnar eru umtalsvert léttari og sterkari en Cross S1 forverar þeirra, m.a. vegna nano resin efnis og koltrefjabyggingar með 40–45 tonna spennuþoli. Þær veita aukna næmni, meiri kastvegalengd og öruggari svörun í kasti. Handföng eru úr fyrsta flokks korki, hjólasæti fislétt og lykkjurnar keramikfóðraðar úr títaníum – byggt fyrir langlífi og árangur.

Loop Evotec G5 fylgir með stönginni – fimmta kynslóð þessa trausta og vel þekkta hjóls. Það er búið Power Matrix bremsukerfinu sem tryggir jafna, vatnshelda og viðhaldsfría bremsu, jafnvel við átök við stóra fiska. Hjólið er smíðað úr renndu áli með ryðfríum íhlutum og endurbættum hnöppum sem veita betra grip og meiri stjórn.

Á hjólinu er undirlína og Hofsá flotlína – samfelld, hágæða tvíhendulína hönnuð sérstaklega fyrir íslenskar ár á borð við Hofsá, Selá og Miðfjarðará. Hún er aðeins yfir venjulegum þyngdarkvarða og hleður stöngina áreynslulaust. Línan leggst mjúklega á vatnsflötinn og hentar einstaklega vel þar sem nákvæmni og fín framsetning eru lykilatriði, t.d. í logni, mikilli birtu eða lágu vatni. Hofsá nýtist jafnt í stuttum sem lengri köstum, og vinnur vel með smáflugum, túpum og löngum taumum. Rennilínan er í appelsínugulum lit fyrir góða yfirsýn, en skothausinn í látlausum grænum tóni sem truflar síður fisk.

Loop ZT tvíhendupakkinn er frábær kostur fyrir þau sem ferðast með veiðigræjurnar – hvort sem er innanlands eða yfir landamæri – og gera ríkar kröfur um áreiðanleika, næmni og gæði í hverju einasta kasti.