Loop Z1 Einhendupakki 7,9′ #3

Einstaklega vandaður fluguveiðipakki sem inniheldur Loop Z1 einhendu, Loop Evotec G5 fluguveiðihjól, undirlínu og Guideline Presentation+ flotlínu eða aðra sambærilega línu. Vinsamlegast takið fram óskir um annað línuval í skilaboðareitnum í körfu.

Þessi pakki er kjörinn fyrir þá sem vilja nettar græjur til veiða með púpum og þurrflugum. Stöngin er hárnákvæm og fíngerð, fullkomin í litlar ár og læki. Hún fer sérlega vel með grönnum taumum og smáum flugum. Flugustöngin er meðalhröð (e. medium fast action), hún býr að mikilli nákvæmni og fullkominni línustjórnun. Stöngin hentar á lengra sem skemmra færi, jafnt með yfir- og undirhandarköstum.

Loop Z1 flugustangirnar eru umtalsvert léttari og sterkari en forveri þeirra Cross S1, þökk sé nýrri nano resin tækni sem er umtalsvert betri en áður. Þá er hver stöng framleidd með nano graphene koltrefjum sem tryggir góða næmni, en um leið mikið afl. Z stangirnar eru öflugustu hringlaga stangir sem Loop hefur nokkru sinni framleitt. Stangirnar eru með þægilegt handfang sem framleitt er úr korki í hæsta gæðastuðli, sérhannað fislétt hjólasæti og keramikfóðraðar lykkjur úr títaníum.

Stönginni fylgir Loop Evotec G5 sem er fimmta kynslóðin af þeim frábæru fluguveiðihjólum. Þau eru þekkt fyrir stílhreint útlit og einstök gæði. Evotec G5 er með „Power Matrix Drag System” sem er einn áreiðanlegasti bremsubúnaður sem fyrirfinnst í veiðihjólum. Það kerfi hefur Loop notað til margra ára enda fyrir löngu sannað ágæti sitt. Bremsan tryggir jafnt og áreynslulaust átak og veitir þannig veiðimanni mikið forskot. Búnaðurinn er algjörlega lokaður og vatnsheldur.

Hjólið er framleitt úr renndu áli en aðrir hlutir þess eru m.a. gerðir úr áli og ryðfríu stáli. Útlit þess er virkilega fallegt og fær málmgrár liturinn að njóta sín. Á því eru nýir endurhannaðir bremsuhnappar sem veita notandanum betri stjórn á bremsubúnaðinum. Þá hefur spóluhnappinum verið breytt þannig að hann auki heildarstyrk rammans og veiti betra grip þegar skipt er um spólur.

Á hjólinu er undirlína og Guideline Presentation+ flotlína. Þetta er alhliða lína sem var upphaflega hönnuð með nákvæmni og framsetningu að leiðarljósi – sérstaklega fyrir silungsveiði í minni ám og vötnum. Hún nýtur sín hvað best á stuttum til meðal löngum köstum, þar sem takmarkað pláss er fyrir bakköst og næm stjórn á flugunni skiptir öllu.

Skothausinn er þjappaður með stuttri afturmjókkun og miðkafla sem veitir línunni hraða, en stór hluti þyngdarinnar liggur aftarlega og hentar því einstaklega vel fyrir veltiköst. Framhlutinn tryggir mjúka og nákvæma framsetningu – jafnvel með löngum taumum. Lægri línuþyngdir eru frábærar í þurrflugur, en #5 og #6 duga vel til að kasta púpum og straumflugum þegar þörf krefur.

Loop Z1 stangarpakkinn er sannarlega vandaður og hentar öllum þeim sem kjósa gæði og áreiðanleika.